Friday, September 01, 2006

الي أمي

ــ هتتغدي معانا النهارده؟؟؟
سؤال من امي و انا بفتح باب الشقه و نازل الشغل
ــ لا يا أمي معتقدش, يمكن اخلص شغلي و اطلع علي الرحاب ابييت هناك و الا انزل مع اصحابي
ــ هو فيه اييييه انت بقيت مبتقعدش في البيت خالص, دانت من ساعت مرجعت واحنا بنشوفك بالعافيه....انت مش عايز تقعد في البيت ليه؟؟؟ احنا مزعلينك في حاجه؟؟؟
ــ يا أمي الموضوع مش كده خالص انتي ليه حسه بكده
و فتحت الباب ونزلت في هدوء
يا ولدتي العزيزه الموضوع مش كده ذي مانتي حسٌاه, الموضوع اني بس بقيت احب اقعد لوحدي شويه و بقت عندي ميول مختلفه عن مجرد القعاد قدام التلفزيون و تلقي هذا البث المباشر من الهبل و الانحطاط الفكري و التخلف, فانا احب اقعد لوحدي بعيداً عن الناس اجلس فقط مع نفسي افكر اكتب اقراء احلم...و هي اشياء لم اعد استطيع عملها بالبيت القديم معكم
ان اهتمامتنا اختلفت و لم نعد علي نفس الطريق, انا اسف علي ذلك ان كان سيريحك اعتزاري و انا اعلم انه لن يريحك

10 Comments:

Blogger أحمــــــــدبــــــــــلال said...

أواجه نفس المشكلة
يابنى انت كل يوم هاتخرج
مابتقعدش فى البيت ليه أحنا مزعلينك
أتأخرت ليه ؟مش كنت تتصل من بره
و الموضوع ده بالذات عملى مشكلة حقيقية فى البيت تخيل أنت سايب أصحابك و رايح تعمل تليفون
يابنى هاتكلم مين دلوقتى ماحنا كلنا سوا مع بعض ؟
معلش هاكلم ماما علشان ماتقلقش عليا

مع أحترامى لأمى أنا كبرت خلاص لما تكون قاعد مع بنات و ولاد و أنت الوحيد اللى قلقان على التأخير فى البيت مع أن الساعة لسه 11.30
تخيل يبقى شكلك أيه؟
هاقولك تربيتى غير تربيتهم ماشى أنا موافق بس أهلى مايعرفوش أن فى حاجات تانية دخلت فى التربية دى من أول يوم خرجت فيه من البيت و سابونى لوحدى
مثلأً أول يوم فى الحضانة خلاص بدأت ترتبط بناس جديدة و عندك أصحاب أهلك مش هايعرفوهم
ممكن تقوم بمغامرات لو أهلك عرفوها ممكن تبقى مشكلة بالرغم من أنها شئ عادى جداً
بقى ليك حياة تانية مش ضرورى يعرفواأدق خصوصياتها لأنها حياتك انت
لا أنكر فضلهم عليا بس أنا ليا مساحتى من الحرية برضه و عاوز أحتفظ بيها
أفكارى نضجت تطورت تغيرت و هو الاهم

تحياتى الى أصدقائك
و أليك
و الأهم الى
والدتك

Fri Sep 01, 09:19:00 AM 2006  
Blogger أحمــــــــدبــــــــــلال said...

ملحوظة صغيرة لابد من أنك أدركتها
أننا نحن الاثنين من نفس السن لذا غالباً ما تواجه نفس المشكلات فى حياتنا الاجتماعية من حولنا

Fri Sep 01, 09:22:00 AM 2006  
Anonymous Anonymous said...

يا جماعة المشكلة مش مشكله السن سواء صغير أو كبير , الأم حتفضل أم سواء كنت كبير أو صغير ، متجوز أو سنجل برضه حتفضل قلقانة علينا طول العمر ، وبعدين الساعة 11:30 باليل دى كدة رحمة يا جماعة مش أحسن من انها تتكلم الصبح أول ما أنت تروح الشغل ( ها ياحبيبى وصلت بالسلامة......... الحمد لله يا ماما) وقبل ماتنزل من الشغل ( ها ياحبيبى حاتيجى أمتى .......شوية وجاى يا ماما...... طب ياحبيبى على مهلك وسوق براحه....... حاضر يا ماما ...... طب أقوم أسخن الأكل عقبال ماتيجى بأه ....... ماتتأخرش ياحبيبى :)
أصل القلق ده طبع فى كل المصريين وخصوصاَ الستات بيعيشوا وبيتجوزا وبيخلفوا علشان يقلقوا .......... متهيألى ممكن يجرلهم حاجة لو مقلقوش ساعة واحده أو دقيقة حتى :)

بكرة ياجماعة نبقى أباء و أمهات ......... بس تفتكروا حنعمل كده برضة ولا حنطنش على العيال ونٌفضلهم ؟

وفى الأول والأخر ربنا يخلى أمهاتنا وأبائنا
ويحميهم ويحفظهم من كل شر

أحنا من غيرهم ولا حاجة
........lost.....

With My Best Regards, Mama Nagwa

Fri Sep 01, 11:45:00 AM 2006  
Blogger Sampateek said...

بساء الخير
عجبني ردك عند اوسا بس محبتش اتدخل علشان الخناقة متسخنش

---
انا شخصيا ام قلوقة جدا علي اولادي و بيتهموني الناس اني حطلعهم زي البنات من كتر ربطهم جنبي
بس انا بعمل بالمثل القائل
ليه يبقي ابني علي كتفي و ادور عليه
احنا في زمان صعب و لازم الام تخاف فيه علي اولادها
ربنا يخلي امي
و امك
و ام كل البلوجرية
خالص تحياتي لوالدتك

Fri Sep 01, 02:56:00 PM 2006  
Blogger BackBone said...

احمدبلال:
لاء هو انا بنفض طبعاً و عمري مابكلمهم من بره و انا مع صحابي كبيرهم رنه من علي مبايلي, مهمه لازم يتعودوا علي كده امال ايه.

ملحوظه صغيره, انا اكبر منك بسنه ياولد و المفرود اصلاً كان يبقي عندي 25 بس اصلي عدت سنتين علشان نقلت من السعوديه لمصر.

ماما نجوي:
اه ه ه منك و اللهي حفضل و راكي لغايه متعملي بلوج, شكراً علي رآيك و نورتي البلوج.

كلبوزه:
بساء النور ياست الكل,
شوفتيني و انا بتشتم!!!. لاء وعلشان ايه!!!. ياله, دول اصلاً شكلهم عيال ايه يو سي و دماغهم بيظه.
ربنا يحمينه من الصيف و بلاويه و اللي بيجري فيه.


انما ايه الحلاوه ديه, سعتك بنفسك جيه بتسألي علينا, دحنا زرنا النبي و اللهي. يأهلاً يأهلاً يا ميت تشليون مرحبه.

لاء فعلاً ابقي سيبي ولادك ينزلوا لوحدهم و يتنصحوا كده ويتودكوا يعني. انا امي مش بتتكلم الكلم ده علشان خيفه عليا قد ما انا وحشها و نفسها تقعد تتكلم معايا. دنا كنت بركب مواصلات من وانا عندي 9سنين و كنت بروح من ابتدائي لوحدي بالأتوبيس. و كنت بروح النادي و بخرج مع صحابي كمان.

Sat Sep 02, 04:33:00 AM 2006  
Blogger soosa el-mafroosa said...

نصيحة من واحده مجربة الموضوع ده ..أقعد مع ماما شوية بكرة بعد عمر طويل تقعد لوحدك كده و تقول و لا فمتو ثانية معاكي يامه

أنا شخصيا كانت جيالي فرصة شغل بعد الضهر بس فيه حاجه جوايا كده بقت تزن عليا و تقولي متنزليش خليكي مع ماما شوية بكرة تتجوزي و ما تعرفيش تقعدي معاها..و انا أقول ايه الهبل ده لو كل حد قال كده ماحدش هيشتغل و لا يتحرك من مكانه .لكن الإحساس ده كان جامد جدا و قررت اني استسلمله و فضلت حوالي سنة كانت اكتر فترة قربت من ماما فيها و عوضت عن أوقات كتيرة كنت مأثرة في حقها..و بعد السنة أنا ماتجوزتش ..ماما هي اللي انتقلت بين يدي الرحمن - بعد الشر عن مامتك - ...ما بقولكش اتخلى عن خصوصيتك لكن خليك مع ماما انشالله شوية صغيرين ..أحسن م الدنيا و اللي فيها

Sat Sep 02, 02:19:00 PM 2006  
Blogger أحمــــــــدبــــــــــلال said...

عمو العزيز
(بما أنك أكبر منى)

مقدرش أنفضلهم لأنى أنا شخصياً هاتنفض أول ما أوصل البيت

و النبى أبقى قللى على خطة أنك تعودهم دى علشان أنفذها

و بالنسبة للسيدة كلبوزة و لكن سمباتيك
لازم عيالك يشوفوا الدنيا ماتخليهمش يعملوا زى ما حصلى أنا كان مقفول عليا مليون باب و لكن فى أول فرصة للخروج وحيداً خرجت
كنت بركب مواصلات معرفش رايحة فين علشان أنزل المكان ده و أتعرف على الدنيا اللى معرفهاش
بصراحة فتحت عنيا بنفسى
أرجوكى بلاش تعيشيهم التجربة دى لأنها صعبة للغايةو أخاف على عيالك منها

Sat Sep 02, 02:21:00 PM 2006  
Blogger rasha said...

يا ريت ما تزعلش ممتك لان بيسعب عليهم ان ولادهم اللي كبروهم مش بيقعدوا كتير معاهم انا فاهمه احساسك انك تحب تقعد لوحدك بس همه بيتخيلوا ان احنا كده زعلانين او متضايقين واضح انك بتحب مامتك والا مكنتش فكرت في البوست ده صح؟

Sun Sep 03, 02:21:00 AM 2006  
Blogger sara said...

اشمعنى انا ماما ما بتسألش فيا
اللهم الا لما بتيجى تصحينى من النوم الساعه 10 باليل لكون مت ولا حاجه
وسعات والله بتتحايل عليا اخرج وتشاهد اصحابى فى التليفون عليا ..امبارح قالتلى انها هتسيب البيت وتطفش
هاهاهاهاها
زهقت منى...ضاقت ذرعا

Sun Sep 03, 05:47:00 AM 2006  
Blogger BackBone said...

نورتينا يا سوسه:
عندك حق فعلاً انا بحاول اهوه اقعد معاها, اصل عندي سابقه في الموضوع ده برضه بعد ما ابويا مات وانا في الكليه كان نفسي احكي معاه كتير قوي بس خلاص, ان شاء الله كده ربنا يجمعنا في الاخره احنا و كل القتله

حماده:
معلش سبني ادلعك اصلك الولد الوحيد علي البلوج بتاعي, شوف ياحماده, انا معودتهمش ده همه اللي نفضولي من بدري قوي, مش بقولك كنت برووح من ابتدائي لوحدي. يستحملوا بقه


رشروش:
انا فعلاً بحب ممتي جداً, و واللهي لما ببقي فاضي بخودها و نخرج كده لوحدينا ونروح نتعشي سوا سوا كده و اقعد احكي معاها, و حتي بغنيلها ست الحبايب يا دينايا انتي.ـ


ساره:
لاء انت مش ممكن تسكتي ابداً علي الموضوع ده, هي و صلت انها تشهد عليكي اصحابك كمان, انت يقي متخرجيش من البيت لمدت 6 اشهر لغاية ميجبولك عريس يعجبك, واوعي يضحكوا عليكي بالواد محسن بتاع الكشك اللي في اول الشارع, جدي مهندس و علي ضمانتي...ـ
انا بحب اهدي النفوس

Mon Sep 04, 06:52:00 AM 2006  

Post a Comment

Links to this post:

Create a Link

<< Home