يا صباح المصايب اللي ورا بعضها

مبدئيا عندي انفنونزا

والله اعلم اذا كانت جاتلي من خطبتي و الا لوحدها كده, اللا هوه الكلام في التليفون بيعدي؟؟؟

العربية جابت وش سلندر

وادي اخرت اللي ميشيكش علي الميه كل يوم الصبح, ايه نسيت تاكل نسيت تشرب, نسيت تاخد مصروفك الصبح ,,, امال نسيت تبص علي القربه ليه بقه

لبيك اللهم لبيك

امي طلعت العمره و اخوكم اتسوح في موضوع الفطار ده, يعني لا اكل و لا بحلقه

ربنا يرحمه

ذكري ابويا السنويه الهجريه كانت امبارح, بس انا مش زعلان خالص بالعكس ربنا يلحقنا بيه علي خير. الراجل عمل اللي عليه و دخلنا كلنا كليات محترمة و خلع

انا ضربني السلك

الخياطة اللي في رجلي ديه مش عارف المفروض اعمل فيها ايه, كل يوم برجع وش الصبح و معنديش وقت اروح للدكتور والعربية بقت تيييييت تيييييت

سعاد انا شربت بنزين ياسعااااااد

نزلت ادور المخروبة اللي ركنه تحت ديه لاني معنديش لا وقت و لا نفس عشان اروح اصلحها, لقيت البنزين قاطع و قعدت شفتلي شويت بنزين عجب, بالمناسبة الـ90 طعمه احلي بكتير قوي من الـ80 و لسه مدؤتش الـ92 بصراحه

و اخيراً زيست

رابع خبر اعرفوا الشهر ده انه واحد من صحابي ساب الشغل, بس انا مربوط من لغليغي في الشغل بتاعي و مش هاعرف اعمل الحركه الجامده ديه دلوقت