Thursday, April 19, 2007

حي ٍ ارزق

اخر تطورات الوضع في الخليج الفقري
الشغل:
المدير الغتت بتاعي اتغير و جه مكانه واحد تاني كده ضغنن شويه عنه و الذ الذ
البيت
اختي: الكبيره سافرت جده لعدم توافر فرص عمل نضيفه في مصر للأطباء. وربنا يجيب العواقب سليمه و منقطعش العلاقات مع السعوديه قريب.
ست الكل: دلوقتي بتروح دروس معهد القراءات في المسجد اللي قدام البيت علشان تقضي وقت فراغها
المودام: زهقان تهقان متضايق (انت كل يوم بتروح الشغل و تسبني) لهوه انتي كنتي فاكراني هتجوز و اقعد في البيت و اللا ايه؟ ناس غريبه صحيح. طب اقعدي مع ماما اهوه تونوسوا بعض. لأ انا عايزه اقعد في بيتي لوحدي. طب اقعدي في البيت. لأ منا زهقانه من الوحده. بجد يقطع الجواز و سنينه
العربيه بعد مرجعت من التوضيب محتاجه لسه كمان توضيب: لسه سير الكاتينه اتقطع مني و انا في نص الشارع (و اخوكم اعزل). و اللي ميعرفش, سير الكاتينه ده لو اتقطع يبقي احسنلك تنزل من العربيه و تزق لان اي محاوله لتدوير العربيه ممكن يأثر بالسلب علي الصبابات و تنتهي بعمل نص عمره للمتور
انا فرحااااااااااااااااااااان قوي بالشقه اللي جهزناها مع بعض (بغض النظر عن كل المشاكل اللي حصلت) انما اي حد بيزورنا بيُشيد بالعفش و زوقه و طريقه الفرش.
فكرت المطبخ المفتوح طلعت توحفه و كل المعارضين لما شافوه حطوا لسانهم في بقهم و بلعوه
الشقه لسه تحت التجهيز. انا عايز اقولكم ان ليله الدخله الصبح مكنش السخان لسه اتركب. هيـيـيـيـيـئ مش متخيل شاكلي الساعه 4 الصبح تحت الميه الساقعه.
اللي مش كويس في الليله كلها ان مراتي بتحكي كل حاجه لحماتي و المضوع ده مش بيعدي علي خير عشان حماتي بتسيّحلي و بتقلب العيله عليه لأسباب مش غامضه بس بجد الموضوع كده نتيجوا مش هتبقي في مصلحت حد. ربنا يستر

2 Comments:

Blogger Sampateek said...

الف مبروك على بيت العدل ربنا يسعد ايامك دايما
و شعور الوحدة ده طبيعي اول ما يجي ولي العهد حتقولك مش لاقية وقت اهرش

واحدة واحدة الشقة حتبقى قصر

ربنا يبارك في ست الكل و يوفق اختك في عملها الجديد

و يسعد ايامك كلها يا ابن اختشي

تحياتي

Thu Apr 19, 08:16:00 AM 2007  
Blogger أميرة البلطجية said...

اول ما جي كده تستقبلوني بالاخبار دي؟ ايه عايزني أمرك بمنحة من خزينة الممكلة
يله ما علينا
المهم مبروك الشقة..اهم حاجة الرضا
وربنا يملهالكو سعادة
بس بالله عليك..عبر مراتك
تحياتشي

Sat Apr 28, 11:32:00 AM 2007  

Post a Comment

Links to this post:

Create a Link

<< Home