Monday, June 18, 2007

طخاتيــــــف

اكتشفت امبارح و انا قاعد قدام امي و هي بتذاكر انها بترفع حواجبها لما بتركز قوي, و بكده عرفت انا و اخد العاده دي من مين.
وانا رايح اصلي المغرب شوفت عصفور واقف لوحده علي علم متعلق في عمود نور, ياتري العصفور ده مطرود من الشجره و اللا متخانق مع العصفوره بتعاته و هوه اللي سابلها الشجره و خرج يهيم في الشوارع. بس اللي زعلني بجد انه تقريباً دي اول مره يبيت فيها بره البيت لانه مكنش عنده خبره ان عومد النور ده هينور كمان عشر دقايق و هيضطر يروح لأنه مش هينفع يصحي واحد صحبه بعد المغرب عشان ينام عنده و طبعاً العصافير معندهاش لا قهاوي و لا كوفي شوبس, ربنا يكون في عونه.
النهارده يوم عظيم في حياتي في ناس غالين عليا قوي مشفتهمش من يجي 10 ويكس كده, اينعم انا زعلان منهم قوي عشان مكنوش بيتكلموا بس برده اكيد كان عندهم عذر. حاسس احساس غريب قوي.



احساسى دا ممكن يهد جبال .. يضيع
بين حبى ليكى وكرهى ليكى خيط .. رفيع
لا القرب مرتاح له . ولا البعاد اقدر عليه
حاجات كتيرة بحسها وانا بين .. اديكى
كتير بخاف منك وكتير بخاف .. عليكى
لا القرب مرتاح له . ولا البعاد اقدر عليه

4 Comments:

Blogger الوردة السوداء said...

اكتر من كدة

وبتعدى ولله

Mon Jun 18, 03:57:00 AM 2007  
Anonymous DR.REHAM TH. RIZK said...

ربنا يرد كل العصافير المهاجره لبيوتها يارب
ياريت تقول لصوت فيروز اني بموت في الكشري فعلا وأول ما ارجع مصر هتلاقيني معسكره عندها لأن الكشري وحشني اوي وطبق الكشري المصري هنا ب 10ريال
عايزه اطلب من كل الناس اللي هيقروا الكومنت ده يدعولي دعاء فك الكرب لأن دعاء الغائب مستجاب بأذن الله وانا في كرب شديد يا جماعه وكفيلي مبهدلني و مش عايز يديني الجواز بتاعي عشان أرجع مصر ياريت تدعولي وربنا ان شاء الله هيستجيب,,,,السلام عليكم

Mon Jun 18, 10:52:00 AM 2007  
Blogger bastokka طهقانة said...

عجبني قوي موضوع العصفور ده
علشان يحرم يزعل عصفورته و يعمل ماموص و يسيب الشجرة و يهبد باب الغصن وراه
حمدلة على سلامة الجماعة يا سيدي


ابعد حبة تزداد محبة

ربنا يخلي الست الوالدة و يدلها الصحة

اوروفوار

Mon Jun 18, 12:51:00 PM 2007  
Anonymous Anonymous said...

I love the name Of your web blog page very much
U know / it is one of shakespeare plays ... In English it is (MUCH ADO ABOUT NOTHING)

Extremely wonderful :)
Keep up



Just a cute girl :) :) :)

Sun Sep 28, 04:07:00 PM 2008  

Post a Comment

Links to this post:

Create a Link

<< Home