ايــــــه كولنا لها
كل ظالم جبار جته نصيبه تخده
و كل عروسه جميله ظاريفه جتها نيله
بمناسبه الجواز (يقطعه و يقطع سنينه) انا قررت اشاركم معايا في المسؤوليه حيث اني مش لاقي كلام صريح و لا مرجعيه ثابته في الاتفاقات المبرمه لتجهيز الشقه
انا اتفقت علي اني هشتري مايلي:
نجف و سجاد و ستاير و اجهزه كهربيه
و العروسه اهلها هيشتروا مايلي:
الفرش و الديكور و المطبخ و خشبه
اما عن العفش فهيكون بالنص و هنشارك فيه بالنص و هو كما يلي:
انتريه و سفره و حجرت نوم رئيسيه.
و دا كان الاتفاق اما بقه عن الاختلافات فتم الاتفاق عليها كما يلي:
الاختلاف الأول:
المعطي: قررنا نعمل نغير حوض المطبخ و نعمله ساقط في الرخامه.
السؤال: هل هذا يندرج تحت بند التجهيزات الاساسيه في الشقه حيث انه يعتبر تغير في التشطيبات الاساسيه (حوض المطبخ) و بالتالي يجب الصرف عليه من ميزانية العريس لتجيز الرخامه و الحوض الساقط مع اعطاء قطعه من نفس نوع الرخام للنجار عشان يبقي يجيب زيها في بقيت المطبخ؟ ام انه يعتبر ضمن تصميم الجديد للمطبخ المتفق عليه بين العروسين حيث ان الحوض السابق كان لا يخل بالتجهيزات الاساسيه و بذالك يندرج تحت تجهيز المطبخ و يقع داخل ميزانيه العروسه؟
الاختلاف الثاني:
المعطي: الديكورات علي العروسه.
السؤال: هل تعتبر المرايات من الديكورات و بذالك تندرج تحت ميزانيه العروسه؟ ام ان الزجاج يعتبر من الاشياء المتعارف عليها تبع العريس؟
الاختلاف الثالث:
المعطي: الاجهزه الكهربيه علي العريس.
السؤال: هل تعبر الكبة و الخلاط من الاجهزه الكهربيه و كده تبقه تبع العريس؟ و اللا هيه تبع اجهزه المطبخ و متعارف عليها انها تبع العروسه حتي لو كانت الاجهزه عموما تبع العريس؟
احب برده ادي فكره عن ميزانية الجواز عموماً بالنسبه للاجهزه الكهربيه اللي جبتها و الاسعار:
بوتجاز: فريش
المميزات: فوق و فرن استنلستيل, اشعال ذاتي فرن و شوايه, مقاس 60*90, مزود بجهاز امان للفرن و الشوياه لضمان عدم تسرب الغاز و الاعمار بيد الله, ضمان 7 سنين من تارخ التركيب اذا تم بمعرفت خدمت عملاء فريش
السعر: 1600 جنيه ينطح جنيه من كرفور و التسليم جوه باب الشقه.
سخان: اوليمبك
المميزات: 40 لتر, ضمان 3 سنين من تاريخ الشراء(تقريبا ً).
السعر: 465 جنيه ينطح جنيه من كرفور و التسليم جوه باب الشقه و اذا حبيت تخده فسعتها و انت واقف ابقه خده (و متقلقش كولنا بنخده, عادي).
تلاجه: اديال آليت
المميزات: 18 قدم و واسعه, نو فروست(مبتعملش تلج), ضمان 3 سنين من تاريخ الشراء
العيب: صوتها عالي شويه.
النصيحه: عندك التلاجه التوشيبا ملهاش صوت تقريبا ُو ضمان 5 سنين, بس ال18قدم بتعتها ليها 3باب (تلاجه و فريزر و درج خضار)و حجم التلاجه صغيرفيأما تجيب الـ14 قدم توشيبا لأن مفيش منها الـ 16قدم و بصراحه هتقف عليك بحوالي 2400 جنيه و الخيار كله في ايدك لغاليه متشتري (بعد كده هيروح في حته تانيه, متقلقش كلنا خدناه, عادي)
السعر: 3150 جنيه ينطح جنيه تقريبا ً و من كرفور برده و التسليم جوه باب الشقه (و طبعاً جوه باب البيت ده عشان يعرفوا يدوك الخيار برحتهم, اوعي تقلق).
الغساله: اديال زنوسي الآكواتك.
المميزات: 18 برنامج, ضمان 3 سنين من تاريخ التركيب
السعر: 3250 جنيه ينطح جنيه تقريبا ً و من كرفور برده و التسليم جوه باب الشقه.
ده لغاية دلوقتي و سنوافيكم بالباقي قريبا ُ حسب مهنشتري
بس ياريت تردوا علينا في موضوع الاختلافات ده بسرعه و حيات اغلي حجه عندكم.
ملحوظه:
مع مراعات اختلاف الاحمال علي الخيار.
posted by BackBone at 6:24 AM
10 comments
